Mugwengezo : ’’Abapfunzwe bazira ukwiyamiriza ikiringo ca gatatu ca Nkurunziza berekanye ubutwari’’

Ugupfungirwa ivyiyumviro ushikirije, vyerekana ubutwari bw’umuntu atemera kurya umunwa, atamikwe ijambo, nk’uko vyashikirijwe na Chavineau Mugwengezo, Umukuru w’Umugambwe w’iteka wa UPD-Zigamibanga.

Abanyororo 65 bahagaritswe mu myiyerekano yo ku munsi wa gatanu uheze mu gisagara ca Bujumbura, ubu bapfungiwe mu ntara ya Muramvya, baremeza neza ko baremye kandi bashimishwa no kuba bashoboye kwerekana aho bahagaze kuvyerekeye ikiringo ca gatatu c’Umukuru w’Igihugu, Petero Nkurunziza.

Mu gatondo ko kuri uwu wa kabiri,igenekerezo rya 21 Ndamukiza, abaserukira imigambwe itavuga rumwe n’uwuri ku butegetsi, barikumwe n’abari mu mashirahamwe adaharanira ivyicaro vya poriike, barishikiye mu ntara ya Muramvya kuraba abanyororo bafashwe mu myiyerekano, yabaye kuri uwu wa gatanu uheze mu gisagara ca Bujumbura.

Naho vyabanje kugorana ko baronka uruhusha rwo kwinjira kuraba no gushikiriza agakemanyi abo bapfungwa, umugwi w’abantu 15 muri bo bahavuye bemererwa kwinjira, aho tukavuga Chauvineau Mugwengezo, Umukuru w’umugambwe w’iteka wa UPD-Zigamibanga, aho yamenyesheje kw’abo banyororo baremye kandi ko bashimishwa no kuba bashoboye guserura ikiri ku mutima, mu kwiyamiriza ikiringo ca gatatu c’Umukuru w’igihugu. Ku bwiwe, aho bitavye akamo ko kuja mw’ibarabara biyamiriza ikiringo ca gatatu ca Petero Nkurunziza, bari bazi neza urugamba bajeko kandi ko ari urugamba rw’ukuri, ari naco gituma baremye.

Chauvineau Mugwengezo yaboneyeho akaryo ko kumenyesha ko imyiyerekano yo kwiyamiriza ikiringo ca gatatu ca Petero Nkurunziza izobandanya gushika ku munsi Umukuru w’igihugu yemeye gusohoka mu gacerere arimwo, akamenyesha abarundi n’amakungu ko atazitoza mu matora twimirije.

Mukamenya ko abanyeporitike bari bishikiye aho mu Ntara ya Muramvya ari: Chavineau Mugwengezo, Ferederico Bamvuginyumvira, Disimasi Nduwayo ari mu bagumyabanga batemera ikiringo ca gatatu c’Umukuru w’Igihugu Petero Nkurunziza, Pasikarina Kampayano, Marina Barampama, Zedi Feruzi n’abandi.