Abayobozi b’indero bahamagarirwa gutuza kurya ibiturire aho baherereye

Mu gihe igisata c’indero naco nyene gitungwa agatoke mu bijanye no kurya ibiturire mu bisata bimwe bimwe, icegera ca kabiri c’umukuru w’igihugu ahamagarira abayobozi bo muri ubwo bushikiranganji kugwanya akaboko ko gukorakora, aho baherereye batuze ibiturire uko biri kwose.

Ako kamo, icegera ca kabiri c’umukuru w’igihugu nyakubahwa Gerevazi Rufyikiri, akaba yagateye mu nama yariko imuhuza n’abayobozi b’indero mu ntara no mu makomine yose y’igihugu c’Uburundi. Iyo nama rero ikaba ije mu gihe bamwe mu bayobozi b’amashure bagirizwa kurya ibiturire mu ntango z’umwaka w’ishure, iyo hari bamwe mu bana bariko bararondera aho biga, abandi nabo bakarya ibiturire ku barezi barondera aho bigisha, canke barondera kwungururizwa ahandi,canke nko kunyonora amatungo y’ibisata barongoye.

Muri iyo nama n’icegera ca kabiri c’umukuru w’igihugu Rufyikiri, kakaba kari n’akaryo ko kurabira hamwe n’abo bayobozi b’indero ico korwa kugira igisata c’indero kigumane akanovera hamwe kurabira hamwe ukwo hokwitegurirwa umwaka w’ishure w’2014 ushira uw’2015.