Cibitoke : Abanyarwanda badafise ibibaranga bahagaritswe n’igiporisi

Mu ntara ya Cibitoke, abajejwe umutekano barahagaritse abanyarwanda bagera kuri mirongo ibiri batari bafise vyangombwa bibaha uburenganzira bwo kurangurira imirimo yabo mu Burundi. Bose bapfungiwe mu busho bwo mu Rugombo no mu Cibitoke.

Intara ya Cibitoke ni imwe muzikunze kubonekamwo abanyamahanga, cane cane abanyarwanda baharangurira imirimo yabo, abandi nabo bahashinga imiryango. Bamwe muri abo banyamahanga usanga hari abakwije ibisabwa n’amategeko, abandi bakaba batagira ibibaranga bibaha ubwo burenganzira bwo gukorera ku butaka bw’Uburundi. Mu bikorwa vy’ukugenzura uruja n’uruza muri iyo ntara ya Cibitoke, igiporisi carahagaritse abanyarwanda bagera kuri mirongo ibiri batagira ibibaranga. Bagifatwa baciye bajanwa gupfungirwa mu busho bwo mu Rugombo hamwe no mu Cibitoke.

Abajejwe intwaro muri iyo ntara ya Cibitoke bamenyesha ko bakiriko baragira amatohoza kugira bamenye imyidondoro y’abo banyarwanda, bakaba bazoheza bagashikirizwa inzego zibijejwe inyuma y’amatohoza. Abo bajejwe intwaro basaba abanyamahanga bose bakorera ku butaka bw’Uburundi ko kubera imvo z’umutekano, bokwisunga amategeko, kandi barondere impapuro n’ibindi vyangombwa bibarekurira gukorera mu Burundi.