Isidore Rufyikiri yagirizwa kunyonyeza ibihumbi 250 vy’amadorare

Umushingwamanza Isidore Rufyikiri yagirizwa na sentare igwanya igiturire n’abanyonyeza amatungo ya Reta kuba yaranyonyeje amafaranga agera ku bihumbi 250 vy’amadorare y’abanyamerika yari yagenewe ishirahamwe CEBAC (centre burundais d’arbitrage et de conciliation) asanzwe arongoye.

Isidore Rufyikiri, umukuru rw’urwego rw’abashingwamanza rw’i Bujumbura

Sentare igwanya abarya ibiturire n’amatungo ya Reta, mw’itangazo yasohoye yagiriza umushingwamanza Isidore Rufyikiri kuba yaranyonyeje amafaranga agera ku bihumbi 250 y’amadorare y’abanyamerika. Ni ukuvuga amahera arenga imiriyoni 250 y’amarundi. Ayo akaba yari yagenewe ishirahamwe CEBAC rijejwe gutatura amatati y’urudandazwa bidaciye muri sentare ari nawe asanzwe arirongoye.

Umuvugizi wa sentare nkuru irwanya igiturire, Alphonsine Ndizeye, yagiriza Isidore Rufyikiri ko amaze kurengutswa incuro zibiri ariko ntiyitabe. Ku bwabo, ivyo vyerekana ko agomba guhisha ivyo yagirizwa. Alphonsine Ndizeye abandanya avuga ko uwo mushingwamanza yikatiye umushahara avanye muri ayo mahera atanahawe biciye mu masezerano n’abasanzwe baratanze ayo mahera kandi bidaciye mu nzira zisanzwe zitunganije n’amategeko mu kugisha inama abo basanzwe bafatanije mu kurongora iryo shirahamwe. Ikindi kandi yagirizwa, ni kuba yarimuye aho iryo shirahamwe ryari risanzwe rikorera mu nyubakwa za CFCIB (Chambre Fédérale de Commerce et d’Industrie du Burundi) aja gukorera aho bita Ku Mugumya ata n’umwe mubo bakorana abiciye n’ikanda, nk’uko bibandanya bivugwa na Alphonsine Ndizeye.

Uwo muvugizi wa Sentare avuga ko ubushikiranganji bw’ikigega ca Reta busanzwe mbere aribwo bwari bwatanze iyo ngabire ko bwagabishije Isidore Rufyikiri ko yotanga insiguro ku vyerekeye itunganywa ry’ayo mafaranga atari aho naho we n’ishirahamwe asanzwe arongoye bategerezwa kuyasubiza mu maguru masha.

Tubibutse ko kw’igenekerezo rya 17 Kigarama uno mwaka wa 2013, umushingwamanza Isidore Rufyikiri yari yabujijwe kurenga imbibe z’Uburundi ku kibuga c’indege mpuzamakungu c’i Bujumbura, igihe yagira aje mu nama y’abashingwamanza basanzwe bakoresha ururimi rw’igifaransa i Abidjan muri Cote d’Ivoire. Akaba yagirizwa ko ariko arakurikiranwa n’iyo sentare nyene igwanya igiturire. Rufyikiri rero akaba yarateye ivyatsi iyo ngendo yo kumutoteza, kuko avuga ko azizwa kuba ashira ku mugaragaro ibikorwa vy’uguhohotera abatavuga rumwe n’umugambwe uri ku butegetsi CNDD-FDD.