Karusi : Abantu bane nibo baraye baguye mu gitero

Abantu bane nibo baraye bagandaguwe mw’ijoro ry’ejo kuw’Imana rishira kuwa mbere mu gitero cakozwe n’abitwaje ibirwanisho bitaramenyekana ku musozi Muhweza, zone Buhinyuza, komine Buhiga mu ntara ya Karusi.

Muri iryo joro bagikora ico gitero batatu muri abo banyagihugu baciye bitaba Imana, uwugira kane akaba yitavye Imana ariko ajanwa kwa muganga. Ayo makuru aremezwa kandi na Richard Nzokirantevye, buramatari w’intara ya Karusi, akaba amenyesha ko abantu bane aribo bamaze gufatwa ku mvo z’amatohoza.

Tukiri muvy’umutekano, umuntu umwe niwe kandi yishwe akubiswe umupanga mw’ijoro ryo kuwa gatandatu igenekerezo rya 13 Juillet 2013 muri komine Mabanda, intara ya Makamba. Nyene urugo vyabereyemwo, ari nawe yagandaguye uwo muntu yamenyesheje ko yariko yivuna umusuma yari yamuteye, ubu akaba ari mu gasho k’igipolisi muri komine Mabanda, ariko yumvirizwa n’inyamiramabi.

Ikiziga c’uwo yishwe yagirizwa ko ari umusuma ubu kiri mu buruhukiro kw’ivuriro ry’i Makamba mu kurindira ko ibipimo bikorwa.