Imigenderanire y’Uburundi n’Ubutariyano igiye kuvugwa

Uburundi bwaronse ubutumire mw’ihayanisha rizobera mu gihugu c’Ubutariyano, kuva mu kwezi kwa Rusama kugeza muri Gitugutu umwaka uza w’2015.

Ivyo bikaba vyavugiwe mu mubonano wahawe umurwi ukora mu gisata kijejwe ubudandaji hagati y’Ubutaliyano hamwe n’Afrika yo Hagati .Iryo hanishwa rizobera mu gisagara ca Milan mu mwaka w’2015 rero rikazotuma Uburundi bumenyekana nk’uko bivugwa na CESTARI Alfredo yari arongoye intumwa z’uwo murwi. Avuga ko igihugu c’Uburundi gikwiye imashanyo uravye inguvu zikoreshwa mw’iterambere. Amenyesha ko hamwe Uburundi bwo kwitaba iryo hayanishwa, buzohabwa ikibanza giciye amafaranga y’amanyaburaya angana n’umuriyoni buzokwerekaniramwo ibokorwa vyabwo, hongere harihwe itike y’indege ku bantu 10.

CESTARI Alfredo akaba kandi amenyesha ko hamwe Uburundi bwitavye, kakazoba ari n’akaryo keza ko kumenyekanisha igihugu mu barwizatunga b’abatariyano, kugira bashobore kuzana imitahe mu Burundi. Ku bwa Laurent Kavakure umushikiranganji w’imigenderanire y’Uburundi n’ayandi makungu, akaba amenyesha ko ashimira cane uwo murwi wo mu gisata c’ubudandaji hagati y’Ubutariyano n’Afrika yo Hagati, ariko akaba anavuga ko imigenderanire hagati y’Uburundi n’Ubutariyano igoyagoya.

CESTARI Alfredo ahiwe akemeza ko agiye gukora ibishoboka vyose, kugira iyo migenderanire isubire ikomere, co kimwe no kwerekana ishusho nziza y’Uburundi.