Abantu 22 bapfiriye mu gitero mu Bwongereza

Mu giporisi bemeza ariko ko ivyo biharuro ari ivy’imfatakibanza. Abakoze ico gitero barindiriye abakunzi b’uwo muririmvyi batanguye kwiyegeranya kugira binjire muri ico giteramo, baca baturitsa ibisasu.

Mu kiganiro n’abamenyeshamakuru cabaye muri iryo joro nyene, nk’igihe c’isaha icenda, igiporisi camenyesheje ko biboneka ko ico gitero ari ic’iterabwoba, naho ibimenyetso bikwiye bitaraboneka, aho mukamenya ko ata n’uwuriyitirira ico gitero.

Mu gihe ivyo bimenyetso vy’uko ari igitero c’iterabwoba vyoboneka, kizoba kibaye ikigira kabiri gikomeye kibaye mu gihugu c’Ubwongereza, igiheruka kikaba cabaye mu mwaka w’2005, gihitana abagera kuri 52.