Afrika y’Epfo: Sentare nkuru yahagaritse ingingo ya Reta yo kuva muri sentare mpuzamakungu mpanavyaha

Sentare nkuru mu gihugu ca Afrika y’Epfo yavuze ko ingingo ya Reta yo kuva muri sentare mpuzamakungu mpanavyaha ikorera i La Haye mu Buholande, ihonyanga ibwirizwa nshingiro.

Sentare nkuru ya Afrika y’Epfo yavuze ko Reta yategerezwa kubanza kubisaba inama nshingamateka.

Umugambwe utavuga rumwe na Reta mu gihugu ca Afrika y’Epfo DA (Democratic Alliance) niwo wari washikirije ikirego uvuga ko Reta yahonyanze amategeko kuko yari kubanza kubicisha mu nama nshingamateka.

Inyuma y’ibirego vy’umugambwe utavuga rumwe na Reta Democratic Alliance ,sentare nkuru y’igihugu ca Afrika y’Epfo yasavye Reta ko ihagarika ingingo yo kuva muri sentare mpuzamakungu mpana vyaha, ikorera i La Haye.

Umushikiranganji w’ubutungane Michael Masutha, yavuze ko Reta ya Afrika y’Epfo igifise umugambi wo kuva muri Sentare mpuzamakungu, kandi ko ishobora kwunguruza urubanza.

Afrika y’Epfo, Uburundi na Namibia nivyo bihugu vyamenyesheje ubwa mbere ko bivuye muri sentare mpuzamakungu mpana vyaha, vyagiriza iyo sentare ko ikurikirana abanyafrika gusa.