Afrika y’epfo : Umushikiranganji w’ubutunzi yakuwe mu kazi

Umukuru w’igihugu wa Afrika y’epfo, Jacob ZUMA yakuye mu kazi kuri uwu wa kane, Pravin Gordhan, yahora ari umushikiranganji w’ubutunzi. Uwo yakuwe yari afise abakunzi benshi mu mugambwe ANC uri ku butegetsi, abakurikiranira hafi ivya poritike ya Afrika y’epfo bakavuga ko icuka kitari ciza muri uwo mugambwe.

Pravin Gordhan, yahora ari umushikiranganji w’ubutunzi

Jacob ZUMA yamenyesheje ku mugoroba wo kuri uwu wa kane ko ihinduye Reta yiwe. Abashikiranganji cumi nibo basubirijwe. Ubushikiranganji bw’ubutunzi bwahoramwo uwo Pravin Gordhan bwahawe Malusi Gigaba, asanzwe ari somambike wa Jacob ZUMA, uwo nawe akaba yahora ari umushikiranganji w’intwaro yo hagati mu gihugu.

Pravin Gordhan yari asanzwe afise imigenderanire myiza n’abarwizatunga bo mu gihugu ca Afrika y’epfo.