Bubanza : Abantu batatu bapfiriye mu gitero c’abitwaje ibirwanisho

Amakuru ava aho kw‘ibarabara hegereye ishamba cimeza rya Rukoko, amenyesha ko ico gitero c’abantu bitwaje ibirwanisho cabaye nk’igihe c’isaha zibiri z’ijoro, ku modoka yari ivuye mu ntara ya Cibitoke ije mu gisagara ca Bujumbura, babanje kurasa ku mapine.

Ayo makuru nyene amenyesha ko babiri mu batwara imodoka boba baranyurujwe, mu gihe abandi bantu bafashwe bajanwa n’abo bitwaje ibirwanisho, ahantu hataramenyekana.

Bamwe mu baba hafi y’ahabereye ico gitero, bavuga ko ico gitero coba cakozwe n’abasuma bashaka kwiba, abandi bakavuga ko coba cakozwe n’abantu bari mu mirwi yitwaje ibirwanisho.

Abajejwe intwaro aho muri komine Gihanga bahamagarira abafata ingendo kwirinda kugenda ijoro, kuko ariho inkozi z’ikibi zinyegeza mu gukora ubusuma.