CAN 2017: Cameroun yatahukanye igikombe itsinze Misiri

Umurwi nserukira gihugu wa Cameroun niwo watahukanye igikombe c’ihiganwa rihuza imirwi nserukira bihugu vyo ku mugabane wa Afrika CAN 2017, inyuma y’ugutsinda umurwi nserukira gihugu wa Misiri, ibitsindo bibiri ku gitsindo kimwe ca Misiri.

Urukino rwatanguye umurwi nserukira gihugu wa Misiri uri imbere y’umurwi wa Cameroun, haba mu gusatira no gutembereza umupira hagati mu kibuga, bica bituma ku munota wa 21 w’igice ca mbere umukinyi El Neni atsinda igitsindo ca mbere ca Misiri,bituma baja kuruhuka Misiri iri imbere.

Mu gice ca kabiri c’urukino, umurwi nserukiragihugu wa Cameroun waje mu kibuga nawo wahinduye umukenyuro, ku munota wa 58 umukinyi atigeze akina kuva ihiganwa ritangura, Nicolas Nkoulu yinjiza igitsindo ca mbere co kunganya.

Umurwi wa Cameroun wagumye werekana ko ukomeye, kuko ku munota wa 88 hasigaye iminota 2 ngo urukino rurangire,umukinyi, Vincent Aboubakar yinjije igitsindo ca kabiri catumye umurwi nserukira gihugu wa Cameroun utahukana igikombe.

Muri kahise k’ihiganwa rihuza imirwi nserukira bihugu CAN, kibaye igikombe ca 5 umurwi nserukira gihugu wa CAMEROUN utahanye.