Accueil > Amakuru > Mu makungu > Espagne : Abashigikiye ukwikukira kwa Catalogne batsinze amatora
Espagne : Abashigikiye ukwikukira kwa Catalogne batsinze amatora
vendredi 22 décembre 2017
Amakuru dukesha iradiyo y’abongereza BBC amenyesha ko, naho igikorwa co guharura amajwi kitarahera, vyamaze kuboneka ko imigambwe igomba ukwikukira kwa Catalogne ariyo iza imbere n’aho yatakaje intebe mu nama nshingamateka.
Naho ku ruhande rumwe ari umunezero, ku rundi ruhande rw’umushikiranganji wa mbere wa Espagne Mariano Rajoy ni umubabaro, kuko ariwe yabaye mu ba mbere bahakana ubwigenge bwa Catalogne, aba ari nawe atumako ayo matora.
Ari mu buhungiro i Bruxelles, Carles Puigdemont yahora arongoye intara ya Catalogne,yashimye ivyavuye mu matora, avuga ko ari intsinzi y’intwaro rusangi, kandi ko atawushobora guhakana ivyayavuyemwo.
Naho ayo matora yabaye, hari ikibazo co kumemya nimba ivyayavuyemwo bishobora gutorera inyishu, amatati ari hagati y’igihugu ca Espagne n’intara ya Catalogne.
MUGISHA Van Naris
