France:Cedric Herrou yaciriwe ihadabu yama ero 3000 kubera yakiriye abimukira

Umufaransa Cedric Herrou yaciriwe gutanga ihadabu y’amafaranga 3000 vy’amanyaburaya kubera yafashije abimukira bava mu bihugu vya Afrika, baca baca ku rubibe rw’ubufaransa n’ubutaliyano.

Cedric Herrou asanzwe ari umurimyi mworozi,yakiriye abimukira ku rugo rwiwe ruri ahitwa Roya valley, mu bumanuko bushira ubuseruko bw’igihugu c’Ubufaransa.

Cedric Herrou avuga ko azobandanya gufasha abimukira, kuko avuga ko ari igikorwa kiri mu vyo akwiye gukora nk’umwenegihugu (devoir civique),kandi hari n’abandi bamushigikiye.

Ikibazo c’abimukira kirakomeye cane cane muri kino gihe amatora azoba mu kwezi kwa kane n’ukwa gatanu aguma yegereza.

Umushikirizamanza mu gisagara ca Nice yasavye ko yohabwa ikiringo c’amezi umunani kugira barabe ko asubira gukora ayo makosa ,hanyuma bamuhane.
Cedric Herrou gushika ubu atunze urwaruka ruva mu bihugu vya Sudani na Eritreya.