Ubufaransa : Emmanuel Macron yatsinze uwo bahiganwa

Ahejeje gutorwa, umukuru w’igihugu mushasha w’Ubufaransa, Emmanuel Macron w’imyaka 39, yashikirije ko ari iteka rikomeye hamwe n’amabanga akomeye, kubona atorewe kuyobora Abafaransa.Yashimiye abamwizeye bakamuhunda amajwi.

Yiyemeje kwubahiriza ubumwe bw’Abafaransa, hamwe n’ugukomeza umutekano w’ico gihugu.

Emmanuel Macron yavuze kandi ko azorwanira iteka ry’igihugu ciwe, kugira isanamu yaco igume ari nziza mu makungu, yongere akomeze ubucuti bw’Ubufaransa hamwe n’ibindi bihugu vyo ku mugabane wa Buraya.

Mu gihe igihugu c’Ubufaransa kimaze iminsi cibasiwe n’ibitero vy’iterabwoba ry’abihevyi, Emmanuel Macron yamenyesheje ko igihugu arongoye kigiye gufata iya mbere, mu kurwanya iterabwoba yaba ku butaka bw’ico gihugu canke ahandi hose kw’isi.

Emmanuel Macron abaye umukuru w’igihugu w’umunani atwaye Ubufaransa. François Hollande yahora aramutswa ico gihugu yakeje uwo agiye kumusubirira. N’uwahiganwa na Macron, ariwe Marine Le Pen yamukeje, yemera ko yatsinzwe, amwipfuriza kuroranirwa n’ukuzoshobora gutora inyishu y’ibibazo igihugu c’Ubufaransa gifise.

Abafaransa bitavye ayo matora ku bice 75,9 kw’ijana.