Gambia: Adama Barrow arakirwa mu mabanga yo kurongora igihugu

Kuri uno wa gatandatu igenekerezo rya 18 Ruhuhuma,umwaka wa 2017, niho umukuru w’igihugu mushasha wa Gambia Adama Barrow yakirwa mu mabanga yo kurongora igihugu, mu birori bibera ku murwa mukuru i Banjul.

Adama Barrow yari yarahiriye mu nyubakwa z’ubuserukizi bw’ico gihugu muri Senegal, hari mu kwezi kwa mbere ,umwaka wa 2017.

Umukuru w’igihugu ca Gambia Adama Barrow yashitse ku butegetsi inyuma yaho Yahya Jammeh yasubiriye abanje kwanka kuva ku butegetsi yanse ivyavuye mu matora yabaye mu kwezi kwa Kigarama,umwaka wa 2016.

Yahya Jammeh yagondojwe n’uko ibihugu bihurikiye mw’ishirahamwe ry’ubutunzi ry’akarere ka Afrika y’Uburengero CEDEAO birungitse abasirikare aca ahungira mu gihugu ca Guinne Equatoriale.

Uyu munsi wo kwakira Adama Barrow ku butegetsi,uhururiranye n’ihimbazwa ry’imyaka 52 igihugu ca Gambia kimaze kironse intahe yo kwikukira, kandi akaba abaye umukuru w’igihugu agira gatatu.