Guinee Equatoriale:Igihugu ca Tchad kirahakana kugira uruhara mw’itembagazwa ry’ubutegetsi

Mu kiganiro yahaye iradiyo y’abafaransa RFI,Teodore Obiang Nguema ntiyigeze yemera gushira ku ruhande ko umukuru w’igihugu ca Tchad Idriss Deby yari afise amakuru y’iryo tembagazwa ry’ubutegetsi ryahatswe gukorwa.

Umushikiranganji w’imigenderanire n’ayandi makungu mu gihugu ca Tchad,Cherif Mahamat Zene yahakanye ko umukuru w’igihugu ca Tchad yoba afise uruhara muri iryo tembagazwa ry’ubutegetsi.

Cherif Mahamat yavuze ati : “Ntimuhave muvuga ivyo umukuru w’igihugu wa Guinee Equatoriale atavuze,amatohoza aracabandanya kandi ntimuhagarare cane ku bantu bafashwe kuko ntawuzi abantu boba binyegeje inyuma yabo babatumye.”

Uwo mushikiranganji w’imigenderanire wa Tchad yavuze kandi ko bafise ayandi makuru mashasha hataragera ko bayashira ahabona.

Cheriff Mahamat yavuze ati :« Ukwo n’ukuri kandi abanyagwineya ubwabo barabizi,yaba umukuru w ‘igihugu wa Guinee Equatoriale eka n’uwa Tchad bose baravugana nta cotera amakenga kirimwo ntabwo ari ikibazo gusa c’abantu bafashwe kuko ico kibazo ni kinini gusumba uko muvyibaza, kandi kiraba abanyagwineya ubwabo,n’ukurindira amatohoza ahere ntimuvuge ivyo umukuru w’igihugu ca Guinee atavuze. »

Mur’ico kiganiro, umwe mu batavugarumwe na Reta y’umukuru w’igihugu ca Guinee Equatoiale yamenyesheje ko umukuru w’igihugu ashikiriza ibitarivyo kuko abapfunzwe kugeza ubu kubera iryo tembagazwa ry’ubutegetsi ryahatswe atari abantu 20 ku bwabo baziko ari abantu 200.

Abo batavugarumwe na Reta ya Teodore Obiang Nguema bamwagiriza ko yafashwe impfungwa zari muri komisariya y’i Malabo azungururiza ahitwa i Bata harangwa no guhohotera abapfungwa bakahagereranya na Guantanamo.