Hashizweho konte mw’Ibanki Nkuru y’Igihugu yo guterera amatora yo mu mwaka wa 2020

Mw’ijambo umukuru w’igihugu yashikirije abarundi n’amakungu kuri uno wa gatanu igenekerezo rya 30 Ruheshi 2017,mu ntumbero yo guhimbaza imyaka 55 iheze Uburundi buronse intahe yo kwikukira, yavuze ko mugushigikira amatora yo mu mwaka wa 2020, abarundi bararikiwe kare kuri konte inomero 1110/267 yuguruwe mw’ibanki nkuru y’igihugu.

Mu ntumbero yo kworosha ico gikorwa,umukuru w’igihugu yasavye amabanki atandukanye n’amashirahamwe yo kuziganya no kuguranana gukorana n’Ibanki nkuru y’Igihugu mu kworohereza abipfuza guterera, kugira amatora ya 2020 azoshike igihugu caramaze kwisuganya.

Muri iryo jambo umukuru w’igihugu yamenyesheje ko umuntu wese ashatse guterera azoterera ukwo ashoboye, mu ntumbero yo kwereka amakungu ko abarundi bashoboye kwitunganiriza amatora azira akanenge.

Yavuze ati: «Umwe wese azoterera uko ashoboye, gutyo twereke amakungu ko Abarundi dushoboye kwitunganiriza amatora azira utunenge tutarinze kuzera inze, nakare akimuhana kaza imvura ihise. Iyo ni imwe mu nzira zo gutsimbataza intahe y’ukwikukira na demokarasi mu gihugu cacu, na kare iyo ntahe y’ukwikukira twayironse iciye mu matora mu 1961.»

Umukuru w’igihugu yavuze ko kwitunganiriza amatora hakoreshejwe uburyo bw’abarundi bonyene ubwabo ari imwe mu nzira zo gutsimbataza intahe intahe yo kwikukira n’intwaro rusangi mu gihugu.