Ibibazo umunani nivyo bizogaruka mu biganiro nyezina vyimirije

Umubonano wahuje abatavuga rumwe n’ubutegetsi hamwe n’umuhuza mu biganiro bihuza Abarundi yabereye i Arusha wari uwo kurabira hamwe ibizoganirwa mu biganiro nyezina bishobora gutunganwa mu ntango z’ukwezi kwa kabiri, nk’uko bivugwa na bamwe mu batumiwe muri uwo mubonano. Abo bari i Arusha bamenyesha ko umuhuza yababwiye ko vyanse ko ibiganiro bitangura mu kwezi kwa kabiri azoca akinjura muri ayo mabanga.

Mu rupapuro rw’inzira rwahawe abo batumiwe i Arusha, habonekamwo ibibazo umunani nyamukuru umuhuza avuga ko bizoshimikirwako mu biganiro nyezina bigiye gutunganwa. Ivyo navyo ni ikibazo kijanye n’ibiringo vy’umukuru w’igihugu, ikijanye n’umutekano w’igihugu, iyubahirizwa ry’amasezerano y’i Arusha yateweko umukono mu mwaka w’2000 hamwe n’iyubahirizwa ry’ibwirizwa shingiro, ikibazo kijanye n’iyubahirizwa ry’agateka ka zina muntu, ikijanye n’ukugarukana icuka ciza ca poritike, ikibazo kijanye n’isesagurwa ry’amatunga ya Reta aho umuhuza yemeje ko Uburundi buri mu bukene bwinshi, ikibazo c’impunzi z’abarundi ziri mu bihugu bitandukanye hamwe n’ikibazo c’ubwigenge mu gushikiriza ivyiyumviro mu Burundi.

Umuhuza Benjamin William Mkapa yakiriye kuri uwu wa mbere abo banyeporitike batavuga rumwe na Reta mu mirwi itatu. Umurwi wa mbere wari ugizwe n’abanyeporitike baje bava mu mahanga aho bahungiye, umurwi wa kabiri nawo ukaba wari ugizwe n’abanyeporitike baje bava i Bujumbura.

Kuri uwu wa kabiri naho, umuhuza MKAPA niho yabonanye n’umurwi ugira gatatu ariwo wa nyuma. Uwo nawo ukaba wari ugizwe Alice NZOMUKUNDA arongoye umugambwe ADR, Mathias BASABOSE nawe nyene wo mu mugambwe ADR, hamwe na Sylvestre NTIBANTUNGANYA yigeze kuba umukuru w’igihugu c’Uburundi.