Ishure Kaminuza Nderabigisha ENS ryatumyeko abanyeshure bashasha kuja kwiyandikisha

Nkuko biri mw’itangazo ryateweko umukono n’umuyobozi w’iahuri kaminuza nderabigisha ENS Dr. Ir Hassan NUSURA abanyeshuri bazokwiyandikisha kuva kw’igenekerezo rya 11 gushika kurya 22 Nyakanga 2017, mu kigo c’ishuri ENS kiri mu Kigobe.

Ubuyobozi bw’ishuri kaminuza nderabigisha ENS bumenyesha kandi ko hari impapuro zisabwa kugira umunyeshuri aronke uburenganzira bwo kwiyandikisha, izo nazo akaba ari:

Urupapuro rw’amavuka,urupapuro ruriko umwidondoro ukwiye,urupapuro rwerekana uko ubuzima bwiwe bwifashe,urupapuro rwemeza ko adakurikiranwa n’ubutungane,urupapuro rwerekana ko afise imico myiza,urupapuro rwerekana aho yagiye arikurikiranya kwiga,udufoto duto duto dutatu, hamwe nico ivyo vyose bibikwamwo.

Muri iryo tangazo,ubuyobozi bw’ishuri kaminuza nderabigisha ENS bumenyesha ko ingingo yoo kwiyandikisha itaraba abiga mu myaka ya kabiri kuduga, kuko bobo bamaze kwiyandikisha, mbere n’ivyigwa vyatanguye.

Ubuyobozi bw’ishuri kaminuza nderabigisha ENS burangiza bumenyesha abanyeshuri bazoba biyandikishije, ko isango ryo gutangura ivyigwa rizomenyeshwa hanyuma.