Itegeko rigenga kwororera mu mpongore ryemejwe n’inama nkenguzamateka

Umushikiranganji w’uburimyi n’ubworozi Deo Guide RUREMA yamenyesheje ko imvo n’imvano y’iryo tegeko ari kugira bagwanye ibitungwa vyiyerereza bidacandarwa iyo hatunganijwe incanco,kugwanya amatati ari hagati y’abarimyi n’aborozi ,kugwiza umwimbu kuko iyo inka ziyerera zita amase ku misozi ifumbire igaca ihatakarira hamwe no kurwanya iyonona ry’ibidukikije ritumwa n’ibitungwa biyerera.

Bimwe mu bibazo vyabajijwe n’abakenguzamateka nibijanye n’imyaka 3 yatanzwe kugira iryo tegeko rije mu ngiro kandi hariho intara zimwe zimwe ziza zaratanguye gushira mu ngiro iryo tegeko hamwe n’amakenga ko iryo tegeko rizotuma inka z’ikirundi zizohava zihona mu gihugu.

Kurivyo bibazo umushikiranganji Deo Guide RUREMA yishuye ko ikiringo c’imyaka 3 catanzwe arico kwitegura kugira hazogere abantu nka bose bashize mu ngiro iryo tegeko.

Kubijanye n’amakenga ko inka z’ikirundi zigiye guhona ,Deo Guide RUREMA yavuze ati: “Haba namba nta nka z’ikirundi zigiye guhona kuko mu kigo ISABU dusanzwe dufiseyo inka z’ubwoko za Kirundi dukoresha mu kwimisha kugira izo nka zacu ntizihone.”

Bitegekanijwe ko iryo tegeko niyo ryemezwa hazoca habaho amategeko mperekeza 8 yaryo.

Iyo nteguro y’ibwirizwa rigenga kwororera ibitungwa mu mpongore ryemejwe ijana kw’ijana n’abakenguzamateka 34 bariho hamwe n’abandi 5 bari batumye.