"Ibwirizwa nshingiro rizohindurwa hisunzwe ivyavuye mu biganiro bihuza abarundi"

Umushikiranganji w’ubutungane Aimee Laurentine KANYANA amenyesha ko ibwirizwa nshingiro ry’Uburundi rizohinyanyurwa hisunzwe ibizoba vyavuye mu biganiro bihuza abarundi bihagarariwe n’umurwi w’igihugu ujejwe ibiganiro CNDI.

Amakuru dukesha itororokanirizo ry’amakuru ABP amenyesha ko umushikiranganji w’ubutungane Aimee Laurentine KANYANA yavuze ko ingingo zimwe zimwe ziri mw’ibwirizwa nshingiro zataye igihe, kuko zidahuye nuko ibintu vyifashe mu gihugu muri iki gihe.

Umushikiranganji w’ubutungane yavuze ko ibwirizwa nshingiro rishasha rishaka gushirwa ku rugero rumwe n’ayandi ma bwirizwa agenga ibihugu bigize ishirahamwe ry’akarere ka Afrika y’Ubuseruko igihugu c’Uburundi kirimwo.

Naho biri ukwo, umuhuza mu matati y’abarundi Benjamin Mkapa mu biganiro biheruka kubera i Arusha kuva kw’igenekerezo rya 16 Ruhuhuma, umwaka wa 2017 yavuze ko uko ibintu vyifashe ubu mu Burundi bidashobora gutuma ibwirizwa nshingiro rihindurwa.