Malte : Umumenyeshamakuru Daphne Caruana Galizia yahitanywe n’igisasu yatezwe

Amakuru ava aho mu Mazinga ya Malte amenyesha ko ico gisasu bagiteze mu modoka yiwe mu gihe yashaka kuja mu buraruko bw’iryo zinga.

Daphne Caruana Galizia yakunda kwandika ku rubuga rwiwe amakuru y’abanyeporitike bakomeye bo muri iryo zinga barya ibiturire, na cane cane umushikiranganji wa mbere Joseph Muscat hamwe n’umupfasoni wiwe bivugwa ko bakoresha amakonte atamenyekana kugira banyegeze amafaranga bahabwa, ariko uwo mushikiranganji n’umupfasoni wiwe bakaba bavyamirira kure.

Inyuma y’urwo rupfu rwa Daphne Caruana, umushikiranganji wa mbere Muscat yashikirije ko agiye gukora ibishoboka kugira abakozwe ico gikorwa kigayitse kitari bwabe murii co gihugu bamenyekane kandi bashigwe imbere y’ubutungane.

Daphne Caruana Galizia yavutse mu mwaka w’i 1964 i Sliema muri Malte akaba yitavye Imana afise imyaka 53.

Umumenyeshamakuru Daphne Caruana Galizia