Nigeria : Ibikorwa vy’umukuru w’igihugu vyahawe vy’imfatakibanza uwundi

Igihugu ca Nigeria kiramutswa vy’imfatakibanza Yemi Osinbajo, icegera c’umukuru w’ico gihugu, akaba ariwe akoreye mu ngata Muhammadu Buhari, umukuru w’igihugu ca Nigeria yagiye mu Bwongereza kwivuza.

Uwo mukuru w’igihugu w’imyaka 75 yaheruka kumara amezi abiri mu gisagara ca Londres, mu gihugu c’Ubwongereza, akaba yari yaramenyesheje umunsi agaruka, ko ashobora kwongera gukenera kwisuzumisha gushasha.

Muhammadu Buhari, umukuru w’igihugu ca Nigeria yagiye mu Bwongereza kwivuza

Nk’uko tubikesha BBC, ku ncuro nke yagiye ahabona mu kwezi kwa gatatu, yagaragara ko afise amagara make, bikaboneka ko atamerewe neza.

Ku kibazo c’ukumenya ryari azotahuka avuye kwivuza mu Bwongereza, umuvugizi w’umukuru w’igihugu yamenyesheje ko ivyo bizomenyeshwa hanyuma, bivanye n’ingene abaganga bazosanga amagara y’uwo mukuru w’igihugu yifashe.