ONU yamenyeshejwe ishirwaho ry’umurwi udasanzwe ugenzura icegeranyo ku Burundi

Muri iryo kete ryo kuwa 8 Nyakanga 2017, Inama Nshingamateka y’Uburundi imenyesha ko yisunze ko iserukira abanyagihugu, mu nama yayo yo kuwa 31 Myandagaro 2017 yashizeho umurwi udasanzwe wihweza ibiri mu cegeranyo c’abahinga ba ONU ku bijanye n’agateka ka zina muntu mu Burundi.

Inama Nshingamateka y’Uburundi iramenyesha kandi ibikorwa vy’umurwi udasanzwe washizweho navyo bikaba ari ivyo kwiga ko ibiri mu cegeranyo ari ukuri, kuraba ko inzego z’ubutungane zikora neza, kuraba urugero Reta y’Uburundi ikorana n’amashirahamwe mpuzamakungu araba ivy’agateka ka zina muntu, no kuraba urugero Reta ikoranako n’abahinga mpuzamakungu mu bijanye n’agateka ka zina muntu n’ibindi.

Muri iryo kete, Inama Nshingamateka y’Uburundi ivuga ko ibwirizwa nshingiro ry’Uburundi rifise ububasha bwo gukomeza intwaro ishingiye ku mategeko, kurwanya ukudahana ivyaha.

Inama Nshingamateka y’Uburundi imenyesha ko abanyagihugu baciye kubo batoye bashobora gutohoza no kugenzura, gushikiriza icokorwa hamwe no kwerekana no guhana abakora ivyaha mu gihugu.

Mwomenya ko uwo murwi udasanzwe washizweho n’Inama Nshingamateka ugizwe n’abashingamateka 12, bava mu mirwi itandukanye iserukiwe mu nama Nshingamateka.

Uwo murwi ufise ikiringo c’amezi atatu, ugashobora kwongerwa mu gihe wobisaba inama nshingamateka, imbere y’uko ikiringo cawo gihera. Icegeranyo c’ivyo uwo murwi uzoba washitseko kizoshikirizwa inama nshingamateka isanzwe ari nayo yashizeho uwo murwi.