Somalia : Amatora y’umukuru w’igihugu ashobora guhungabana

Umurwi wigenga ujejwe gutorera inyishu amatati afatiye ku matora muri Somaliya wahakanye abashingamateka 11 batowe mu matora yabaye kw’igenekerezo rya gatandatu z’ukwezi kwa Kigarama.

Uwo murwi usigura ko ayo matora yabayemwo utunenge kandi ko humvikanye amasasu muri kimwe mu bibanza vy’amatora.

Nk’uko VOA ibivuga, uwo murwi utangaza ko habaye imyidogo myinshi ivuga ko amajwi yaguzwe kandi ko habaye iterabwoba ku banyagihugu bitavye amatora.

Muri uwo murwi bamenyesha kandi ko ibiro vy’umukuru w’igihugu Hassan Sheikh Mohamoud wa Somaliya navyo nyene biregwa kuba vyarabigizemwo uruhara, ariko umukuru w’igihugu Mohamoud akaba ataco arashikiriza kuri ivyo birego.

Ugutevya itorwa ry’abashingamateka bishobora gutevya itunganywa ry’amatora y’umukuru w’igihugu ategekanijwe kw’igenekerezo rya 28 Kigarama uwu mwaka.

Mwomenya ko inama nshingamateka ariyo itora umukuru w’igihugu, kandi itorwa ryiwe rimaze kwigizwa imbere incuro zitatu.