UA isaba amatohoza yigenga ku rupfu rw’umushikiranganji Emmanuel Niyonkuru

Umukuru w’ishirahamwe ry’Ubumwe bwa Afrika umupfasoni Nkosazana Dlamini Zuma asaba abarongozi mu Burundi gushira imbere inzira z’amahoro mu kurangiza amabi akorwa mu gihugu.

Mw’itangazo yashize ahabona inyuma y’urupfu rw’umushikiranganji Emmanuel Niyonkuru yahora arongoye ubushikiranganji bw’ibidukikije,amazi no gutunganya ibisagara, Nkosazana Dlamini Zuma yiyamiriza ubwo bwicanyi agahoza kandi umuryango, Reta y’Uburundi hamwe n’abarundi bose.

Muri iryo tangazo umukuru w’isihirahamwe ry ‘Ubumwe bwa Afrika asaba ko hoba amatohoza abaye mu muco kandi yigenga, akamenyesha ko ishirahamwe ry’Ubumwe bwa Afrika ribonako ibiganiro atawe bikumira hamwe n’umwumvikano ushingiye ku masezerano ya Arusha ,arivyo bizotuma Uburundi buronka amahoro n’umutekano.

Emmanuel Niyonkuru yarasiwe imbere y’umuhana iwe , kw’igenekrezo rya 1 Nzero 2017, avuye kwivuna akanyota.