Ubwongereza: Abantu batanu bapfuye mu gitero cabaye ahakorera inama nshingamateka

Abantu batanu harimwo umupolisi, nibo bapfuye mu gitero cagizwe kuri uno wa gatatu igenekerezo rya 22 Ntwarante,umwaka wa 2017,imbere y’inyubakwa ikoreramwo inama nshingamateka mu gihugu c’Ubwongereza.

Amakuru dukesha iradiyo y’abongereza BBC amenyesha ko,ico gitero cabaye igihe umuntu yari mu modoka yagonga abantu ahitwa i Westminster agatera yinjira mu kigo gikoreramwo inama nshingamateka.

Uwikekwa ko yagize ico gitero yari afise inkoho , yahavuye araswa n’abajejwe umutekano aca aritaba Imana.

Umushikiranganji w’Ubwongereza, Theresa May, yamenyesheje ko ico gitero ari ico ubugizi bwa nabi, aca asaba abanyagihugu gukomeza ubwigenge, no kwishira no kwizana.

Yavuze ko uwakoze igitero yari afise intumbero yo guhungabanya umutekano w’igihugu ,aca asaba inzego zose gukorera hamwe mu kurwanya iterabwoba n’ibindi vyiyumviro bifise intumbero yo gutera urwanko hagati y’abanyagihugu.