"Ikinyamakuru “The New York Times” gisaba Trump guheba kuvuga kw’ abanyameshamakuru ari abansi

AG Sulzberger umukuru wa The New York Times yabimenyesheje inyuma yaho agiraniye ibiganiro ari kumwe n’umukuru w’igihugu Donald Trump bumvikanye ko ivyo baganiiriye bigirwa ibanga ariko uyo mukuru w’igihugu abirengako mu kubishira ahabona abicishije k’urubuga rwiwe rwa twitteur.

Donald Trump yanditse k’urubuga rwiwe rwa twitteur ko ibiganiro vyabo vyari vyiza ariko ukumenyeshamakuru gushira ubuzima bw’abanyagihugu mu kaga k’uburyo bitangaje.

Donald Trump yavuze ati “Twamaze umwanya utari muto tuganira ku makuru akunze gusohorwa n’ibimenyeshamakuru kuburyo ayo makuru ashobora gufatwa nkayadashira imbere ineza y’abanyagihugu.

Uyo mukuru w’igihugu ahejeje gushikiriza ubwo butumwa,ico kinyamakuru caciye gisohora urwandiko rushira ahabona ivyaganiriwe hagati y’umukuru w’ico kinyamakuru hamwe n’umukuru w’igihugu Donald Trump.

AG Sulzberger yavuze ko yemeye ubutumire bw’umukuru w’igihugu kugira bavugane kubijanye nuko Donald Trump akunze kwifatira mu gahanga ibimenyeshamakuru.

AG Sulzberger yavuze ko kimwe mu vyamubabaje aruko Trump yise abameshamakuru abansi b’abanyagihugu.