Umunywanyi agira kabiri wa MSD yafashwe n’igiporisi

Vénérand Habonimana yafatiwe muhira iwe, nk’uko vyemezwa n’umuvugizi w’umugambwe MSD, akaba apfungiwe mu gasho k’igiporisi i Rwibaga, mu ntara ya Bujumbura.

Uw munywanyi wa MSD afashwe inyuma y’umunsi umwe gusa hafashwe uwundi wo muri zone Kamenge, NSABIMANA Dieudonné batazira "Banga" yafatiwe muri karitiye ya Kamenge, mu gisagara ca Bujumbura, gushika ubu akaba atawuzi aho apfungiwe.

Mu mugambwe MSD baratabariza uwo munywanyi apfungiwe mu kibanza kitaramenyekana, bagasaba ko umuryango wiwe wohabwa uburenganzira bw’ukumugendera hamwe n’ukumugemurira ivyo afungura.

Mu gihe uwo munywanyi wa MSD yburirwa irengero, Epithace NSHIMIRIMANA, umuvugizi w’umugambwe MSD amenyesha ko ubuzima bwiwe buzobazwa intwazangabo mu giporisi, Mathias Joseph NIYONZIMA batazira KAZUNGU, kuko uwo NSABIMANA Dieudonné yafashwe n’umuporisi agendanira iyo ntwazangabo.

Abo banywanyi babiri ba MSD bahagaritswe kandi inyuma y’abandi babiri baheruka kuburirwa irengero. Mu mugambwe MSD bamenyesha ko amakuru bafise avuga ko Rémy Ndagijimana na Léon Bangiricenge bamaze kugandagurwa, inyuma y’ugupfungirwa mu gasho katazwi, mu Kajaga