Umurwi CENI watanguye gutanga amakarata aranga abatora ku mirwi CEPI na CECI

Igikorwa co kwakira ayo makarata bashikirijwe n’abarongoye umurwi wigenga utegura amatora ku rwego rw’igihugu CENI, cabaye mu gatondo ko kur’uyu wa mbere, igenekerezo rya 7 Rusama 2018.

Abo bari mu mirwi yigenga itegura amatora ku rwego rw’amakomine n’intara bakiriye kandi intonde bazokwisunga mu gutanga ayo makarata, hamwe n’intonde abazotora bashirako umukono bahejeje gutora ikarata.

Bitegekanijwe ko igikorwa co gutora amakarata aranga abazotora kizotangura kw’igenekerezo rya 9 kirangire kurya 14 Rusama 2018, kandi ko kizobera aho umuntu umwe wese yiyandikishirije kugira azokwitabe amatora yo kwemeza canke guhakana ibwirizwa nshingiro.

Mw’itangazo ry’umurwi CENI ryo kuwa gatatu igenekerezo rya 2 Rusama 2018, umurwi CENI umenyesha ko, igikorwa co gutanga amakarata kizoba gihagarikiwe n’abo mu mirwi itegura amatora mu makomine CECI, hamwe n’abari mu mirwi itegura amatora mu ntara CEPI.