Gitega : Urubanza rw’abayoboke 11 ba RWASA Agathon rurabandanya

Urubanza rw’abayoboke 11 b’umushingamateka Rwasa Agathon rwari rwatanguye kuri uwu wa gatatu rurabandanya ku muhingamo wo kuri uwu wa kane muri Sentare nkuru y’intara ya Gitega. Ababurana bari basavye ko bohabwa akanya k’ugusoma ibiri muri dosiye yabo, hamwe n’uko boronswa akanya k’ukurondera ababafasha kuburana.

Abo bayoboke ba Rwasa Agathon uko ari 11 bagirizwa urupfu rw’umutama Jacques Bukobero, umuvyeyi w’umurwizatunga Venant KAZOHERA, umunywanyi wa CNDD FDD akaba n’umukuru w’umurwi w’umupira w’amaguru wa "Messager Gitega". Uwo mutama yishwe atewe gerenade n’abantu bamusanze muhira iwe kw’igenekerezo rya 22 Ntwarante 2017, ku musozi Gasenyi, komine Nyarusange, mu ntara ya Gitega.

Abaserukira abayoboke ba Rwasa Agathon mu ntara ya Gitega bavuga ko abo bantu bafatiwe imvo za poritike, bagasaba ko borekurwa atakirinze gusabwa.

Mu bushikiranganji bw’intwaro yo hagati mu gihugu barahakana ko ata gatotezo kariko gakorerwa abanywanyi ba RWASA, bakavuga ko abayoboka uwo asanzwe ari icegera ca mbere c’umukuru w’inama nshingamateka ari abantu nk’abandi bose, kandi bashobora gukurikiranwa n’ubutungane mu gihe hari icaha bagirizwa.