Abahora badadandariza mw’isoko nkuru ya Bujumbura ntibigeze bahozwa

Igenekerezo rya 27 Nzero ni ntibagiranwa ku badadandaza baburiye ivyabo mw’isoko nkuru ya Bujumbura. Abo badandaza bakavuga ko umwaka urangiye ata muntu numwe yigeze abagarukirako, ahubwo ko imfashanyo zari zibagenewe zitigeze zibashikira.

Muri sendika Sygeco (Syndicat Général des Commerçants) bavuga ko bagiye kurondera uburyo bwo kwungunganya abadandaza bonyene ubwabo, kuko Reta yo ataco yabamariye kugera kino gihe.
Haraheze umwaka wose isoko nkuru ya Bujumbura ihiye igatokombera. Kuri uno munsi wa mbere igenekerezo rya 27 Nzero 2014, abadadandaza bahoze bakorera muri iryo soko bakaba bahuriye hamwe ahitwa kw’IRARO mu rukurikirane rw’inganda bamazemwo iminsi kugira barabire hamwe ukungene umudandaza muri kino gihe amerewe, bongere barabe inyishu botora ku bibazo bafise muri rusangi, kuko Reta yo isa n’iyabibagiye .
Inama igitangura babanje gufata akanya ko kwibuka umunsi ibintu vyabo vyahira mw’isoko. Bahejeje niho baraba ireresi yerekana uwo munsi, aho mbere wabona ko amosozi yariko arakoroka bibutse ivyababayeko uwo munsi. Abo badandaza akababaro akaba ari kenshi kuko bavuga ko muribo hari abahukanye, abana bataye amashure, abapfunzwe, n’izindi ngaruka zitandukanye zavuye kw’isha ry’isoko nkuru ya Bujumbura.

Audace Bizabishaka, arongoye SYGECO

Nk’uko bivugwa na Audace bizabishaka, umukuru wa sendika SYGECO bariko barondera ubundi buryo bokwikenura, kugira abadandaza bifatafate bo nyene. Mu nyishu rero batoye bakaba bashinze ikigega co gufashanya arico "caisse de solidarité mutuelle." Ku bijanye n’ico kigega rero, umudandaza azoba yiyandikishije muri SYGECO azotanga amafaranga 20000 ku kwezi. Ico kigega nico ndetse n’abafasha bazoshobora gucako kugira imfashanyo ntizisubire kugenda amazimayongo nk’iza mbere zagiye zicishwa muma mashirahamwe yo kuguranana, mbere amwe amwe atari azwi nk’uko bivugwa nabo muri sendika SYGECO, aho atanga akarorero k’ishirahamwe "Uburundi bwacu." Muri sendika SYGECO bavuga rero ko bagiye kurondera icegeranyo c’amashirahamwe yose yoba yararonse imfashanyo, ariko ntiyafasha abo badandaza. Sendika SYGECO yiyemeje kuzoshengeza mu butungane ayo mashirahamwe.

Abo badandaza baburiye ivyabo mw’isoko basaba ko isoko mfatakibanza yo kuri COTEBU ko yoduzwa hejuru kurusha kuko biboneka ko ari ngufi cane, ubushuhe rero bukaba buzobangamira aboja gukorera muri iyo soko. Basaba kandi ko hohabwa ibibanza abahora badandariza mw’isoko nkuru ya Bujumbura gusa, kandi sendika SYGECO igahabwa ijambo mu gihe hazoba hageze gutanga ivyo bibanza.
Imfashanyo nayo yatanzwe n’ishirahamwe FOCODE, igera ku miriyoni 5, abo muri sendika SYGECO bamenyesha ko bazokwongerako izindi miriyoni 5, baheze bace bazigaburira abadandaza bababaye gusumvya abandi, umwe wese akazoronka ibihumbi amajana atanu. Umunsi w’ugutanga ayo mafaranga ukazoba ari iyugururwa icese ry’ico kigega co gufashanya.

Tubamenyeshe ko igihe iyo nama yari imaze akanya gato itanguye, igiporisi caciye kihashika kije kubuza iyo nama, ariko mu nyuma bahavuye bumvikana babaha iminota mirongo itatu itarenga ko boba bahejeje. Icabonetse rero n’uko n’aho baganira, imitima itari mu nda, kuko babona ko umwanya uwari wose igiporisi gishobora kubashwiragiza.