Abahutu bihinduye abatutsi kugira binjire mu gisirikare

Mu ntara ya Cibitoke abahutu bamwe bamwe barahinduye ubwoko bwabo biyita abatutsi kugira baronke amahirwe y’ukwinjira mu bisongerezi vy’intwazangabo mu gisirikare abo bita aba « sous officiers ». Abo bihinduye hageze gukora ibibazo.

Mu bisanzwe, abatutsi bategerezwa kwinjira bagera kuri 10 abahutu nabo 10 nyene . Ariko hageze ibibazo hari abahutu 6 baciye bihindura abatutsi gutyo baca binjira ari abahutu 16, abatutsi nabo hinjira abatarenga 4 kandi bategerezwa kuba 10. Babajijwe igituma bihinduye ubwoko bamenyesheje ko ba se bitavye Imana hanyuma abavyeyi basigaranye baca bababwira ko ba se bari abatutsi.

Mugabo ivyo birabeshuzwa n’abagenzi babo b’ababatutsi bemeza ko bazi neza ubwoko bw’abo bariko barahiganwa mu kibazo c’ukwinjira mu bisongerezi vy’intwazanagbo mu gisirikare c’u Burundi .

Buramatari w’intara ya Cibitoke asaba uwo wese yumva ko yarenganijwe kumwitura ariko yongerako ati : « Uwuzotorera umuti iki kibazo n’ubushikiranganji bw’ukwivuna abansi n’ukwitaho abahoze ku rugamba .»

Si irya mbere abantu bihindura ubwoko mu gihugu c’u Burundi kubera inyungu zabo. Hari abatutsi biyita abahutu kugira baronswe ibiti mu ntwaro canke mu mashirahamwe yaba aya Reta canke mpuzamakungu, eka n’abahutu n’iko kuko ,ubu mbere hari n’abiyita abatwa kuko ari bake rwose kandi bafise abize bake cane muribo bigatuma uwiyise umutwa yarize agira amahirwe y’ukuronka akazi canke igiti mu nzego zitandukanye za Reta.