Abajejwe intwaro n’umutekano bahungabanya amahoro bagabishijwe

Inyuma yaho hagaragariye ukwihorana canke ukwihanira kw’abanyagihu, ndetse ivyo ugasanga bikozwe nk’indenzarugero, umushikiranganji w’intwaro yo hagati mu gihu Edouard Nduwimana ahamagarira abanyagihugu kureka iyo ngendo yo kwihanira.

Umushikiranganji Nduwimana akaba ashikirije ivyo, mu gihe mu mihingo y’igihugu itandukanye havurwa ubwicanyi butandukanye buvuye ku burozi, abandi bakicana bivuye ku mpari z’amatongo mu gihe hari n’abandi bicana ku bw’akaborerwe, abandi nabo bakazira ko bafashwe bivye n’ibindi.

Edouard Nduwimana umushikiranganji w’intwaro yo hagati mu gihugu

Umushikiranganji w’intwaro yo hagati mu gihugu akaba asaba abanyagihugu gushikiriza inzego zijejwe umutekano, ababa bagirijwe amakosa gutyo abanyagihugu bareke iyo ngendo mbi yo kwihanira. Kuri abo nabo babandanya bahohotera abandi mu kwihanira kandi amategeko atabibarekurira, Edouard Nduwimana asaba abajejwe intwaro kubahana bimwe vy’akarorero, ku buryo n’abafise ako gatima ko kwihanira boca bahagarika. Eka akaba yasavye ko n’abajejwe intwaro, umutekano w’abanyagihugu boba bagirizwa amabi yo guhungabanya umutekano, nabo nyene bohanwa atakigongwe.

Ivyo, umushikiranganji akaba abishikirije mu gihe mu gisagara ca Bujumbura hamaze iminsi havurwa ingeso yo kwihanira kw’abanyagihugu co kimwe n’abaporisi bahohotera abanyagihugu. Akarorero ka hafi, akaba ari aho ku munsi wa gatandatu igenekerezo rya 18 Nzero umunyagihugu ariko aradandaza utuntu yacumiswe imbugita kw’izosi n’umuporisi, maze ku munsi wa mbere naho, umuporisi agakubita umunyagihugu gushika naho ahakwa kwitaba Imana.