Abakinyi 2 bo muri FC Barcelone n’ibo bafise ibitsindo vyinshi mu gikombe c’isi.

Igice ca mbere c’amahiganwa y’igikombe c’isi kirangira kuri uwu wa kane. Ibihugu 16 bisezera amahiganwa biza kumenyekana inyuma y’inkino zo ku mugoroba. Ku mugabane wa Afrika, Nigeriya iramaze gushika mu gice c’umunani.

Umunezero w’abakinyi ba Nigeriya

Inkino zaraye zibaye ku munsi w’ejo kuwa gatatu zahuje ibihugu vyo mu mirwi E na F, mu nkino za mbere, zahuje Nigeriya na Argentine. Ku kindi kibuga hariko hakina Bosnie na Iran. Argentine yatsinze Nigeriya ibitsindo 3 kuri 2, Bosnie itsinda Iran 3 kuri 1. Ivyo vya nyuma vyaciye bisezera amahiganwa habandanya Argentine na Nigeriya.

Isaha zine z’ijoro hakinye ibihugu vyo mu murwi E. Suisse yatsinze Honduras 3 ku busa, urundi rukino rwahuje France na Equateur batahanye ubusa ku bundi. Muri uwo murwi Honduras na Equateur vyaciye bikura meza. Mu gice c’umunani, Ubufaransa buzotana mu mitwe na Nigeriya nayo Argentine ihure na Suisse.

Inkino za nyuma z’ikurakuranamwo zirangizwa n’inkino zihuza Reta zunze Ubumwe za Amerika n’Ubudagi. Muri uwo mwanya nyene Ghana iza kuba iriko ikina na Portugal, isaha zitandatu z’ijoro hakina Coreya y’Epfo n’Ububirigi na Algeriya izoba iriko ikina n’Uburusiya.

Mwomenya ko ibitsindo 2 yinjije mu rukino na Nigeriya vyatumye Lionel Messi ahamvya Neymar Junior bakinana muri Barcelone mu bakinyi bafise ibitsindo vyinshi mu bakinyi bose bari mu nkino zo muri Bresil.

Messi ahejeje kwinjiza igitsindo ca kane