Abakozi b’umurwi CENI bakwiye mu gihugu cose bandika abazitaba amatora

Abakozi b’umurwi wigenga ujejwe gutegura amatora bariko barakwiragira amakomine yose yo mu Burundi, mu ntumbero yo gutororokanya ibibanza abanyagihugu bakwije ibisabwa n’amategeko bazokwiyandikishirizamwo, kugira bashobore kwitaba amatora yo mu mwaka w’2015.

Kuva kuri uwu wa 16 Ruheshi gushika ku wa 27 Ruheshi 2014, abakozi b’umurwi CENI bakaba bariko barakora ico gikorwa co gutororokanya ibibanza bizokoreshwa mu kwandika abazotora, mu nyuma hakazoheza hakurikira ibikorwa vyo kwandika abazotora. Bahejeje gutororokanya ibiranga umuntu, abo bakozi b’umurwi wigenga ujejwe gutegura amatora, bazoheza bavyandike ku buhinga bwa none. Intonde z’abatora n’ibibanza bazotoreramwo navyo bimaze kumenyekana, CENI ikazoheza igatanga amakarata y’itora.

Mukamenya ko mu murwi CENI bahamagarira abarundi bakwije imyaka yo gutora gutangura kwitegurira amatora yo mu mwaka w’2015, mu kurondera hakiri kare ibisabwa n’amategeko nk’ikarata karangamuntu kuko uwutayifise atazotora. Amatora nayo, akaba ategekanywa kuzoba hagati y’ukwezi kwa Rusama na Nyakanga mu 2015.