Abandi basirikare b’Uburundi biteguriye kurungikwa muri Somaliya

Bataillon igira iya 22 yo mu gisirikare c’Uburundi yarahejeje ivyigwa yahoramwo vyo mu mugambi ACOTA ufashwe mu mugongo na Leta zunze ubumwe za Amerika. Izo ngabo zikaba ziteguriye kuja mu gihugu ca Somaliya mu bikorwa vyo kugarukana amahoro.

Uwuserukira igihugu ca Leta zunze ubumwe za Amerika mu Burundi, Dawn Liberi yarakeje abo basirikare bo muri bataillon ya 22 y’igisirikare c’Uburundi igizwe n’abasirikare 850 bahejeje inyigisho zamaze amezi abiri zibategura kuja i Mogadiscio mu bikorwa vya Amisom.

Nk’uko tubikura mu tangazo ryashizwe ahabona n’ubuserukizi bwa Leta zunze ubumwe za Amerika mu Burundi, izo nyigisho ziri mu mugambi ACOTA ( African Contingency Operations Training and Assistance) ufashwe mu mugongo n’ubuserukizi bwa Leta zunze ubumwe mu Burundi, ukaba ujejwe guha ubumenyi ibihugu vyo muri Afrika vyitegurira kuja mu bikorwa vyo guhagararira amahoro mu bihugu bikiri mu ndyane, ibihugu 25 harimwo n’Uburundi bikaba arivyo biri muri uwo mugambi.