Abantu bakomeretse mw’isanganya ry’imiduga ryabereye mu gisagara ca Bujumbura

Abantu batatu nibo bakomeretse, babiri muri bo barakomereka cane n’ibindi vyahononekariye, mw’isanganya ry’imiduga ibiri ryabereye mu gisagara ca Bujumbura kw’ibarabara avenue du commerce.

Hari nk’igihe c’isaha zitanu zibura nk’iminota cumi, zo mu gitondo co kuri uyu wa kane igenekerezo rya 29 Rusama 2014, aho imodoka zibiri zasekana hagaca hakomereka ubwo nyene abantu batatu n’ibindi vyahononekariye. Naho abajejwe umutekano bari aho habereye isanganya batashimye kugira ico babivuzeko, abari aho biboneye uko vyagenze, bavuze ko izo modoka zibiri zasekaniye hagati mw’ibarabara hafi y’inyubakwa yo gusomeramwo ibitabu y’ishirahamwe mpuzamakungu ONU (Centre d’information des Nations Unies).

Izo modoka, imwe yari mu bwoko bwa Spacio iyindi mu bwoko bwa Hilux (Double cabine). Nk’uko vyashikirijwe n’umwe muri aho igihe ikinyamakuru IGIHE cahashika, imodoka yari mu bwoko bwa Spacio, yari ije iva kw’ibarabara rija ku nyubakwa ya Leo, yazananye umuvuduko mwinshi, mu gihe iyari mu bwoko bwa Hilux yo yari izananye ibarabara rya Chaussee Prince Louis Rwagasore yari mu muvuduko usanzwe. Bikaboneka ko iyo Spacio ariyo yari mw’ikosa, kuko yarenze amategeko y’ibarabara mu kugendera mu muvuduko utarekuwe mu mahwane y’ibarabara. Niko guca iseka Hilux yari mu burenganzira bwayo bwo kubandanya (Priorite), iyo nayo ica ija guseka inyubakwa ya BTC , irabana n’inyubakwa yo gusomeramwo ibitabu ya Nations Unies. Imiryango, uruhome rw’umuryango n’ibiyo bikaba vyahononekariye.

Umudereva wa Spacio yagonze, Imana yakinze ntaco yabaye kinini ariko akaba yakomeretse ku maguru. Yakingiwe n’umugozi ukinga impanuka yari yambaye (Ceinture de securite). Bruce Sindahera, umudereva wa Hilux yagonzwe, avuga ko mu muduga iwe, hakomeretse cane abantu babiri bari bicaye inyuma y’umuduga bacunze amakaziye y’inzoga bari bavuye kurangura. Mu makaziye ashika kuri 40, akaba atanimwe yasigaye, kuko inzoga zose zamenetse.

Mwomenya ko abo bakomeretse cane, bazwi kw’izina rya Jean Claude na Bukuru bakaba baciye bajanwa kuvurwa ku bitaro vyitiriwe umuganwa Regent Karori.