Abanyeshure bo muri kaminuza nderabigisha ENS bahagaritse ivyigwa

Abanyeshure bo kuri kaminuza nderabigisha ENS bahagaritse ivyigwa mu ntumbero yo kwishuza agafashanyo kabo k’ukwezi kwa Ndamukiza na Rusama katatanzwe ku basubiyemwo umwaka, hamwe n’agafashanyo k’ukwezi kwa Ruheshi ku bandi bose babifitiye uburenganzira.

Guhera kuri uwu wa mbere igenekerezo rya 16 Ruheshi 2014, abanyeshure bo kuri kaminuza nderabigisha ENS barahagaritse ivyigwa, bavuga ko icatumye bahagarika ari ukugira berekane akababaro bafise kubera agafashanyo batararonswa. Umwe mu baserukira abandi banyeshure avuga ko bigoye kuja mu mashure mu gihe baba bariko birukanwa mu mazu bapanze.

Ku cerekeye agafashanyo basaba k’ukwezi kwa Ndamukiza kandi ubushikiranganji bw’amashure ya kaminuza n’ubushakashatsi bwararahiye ko batazokaronswa kuko ukwo kwezi batari mw’ishure, abo banyeshure bavuga ko ari uburenganzira bwabo, ari nayo mpamvu boronswa ako gafashanyo.

Abo banyeshure bo muri kaminuza nderabigisha ENS basaba ko agafashanyo kabo k’ukwezi kwa Ruheshi bokaronswa, n’abasubiyemwo umwaka batahawe agafashanyo kabo basaba ko bokaronswa k’ukwezi kwa Ndamukiza hamwe n’ukwezi kwa Rusama.

Mu buyobozi bujejwe agafashanyo n’ imyimenyerezo barizeza abo banyeshure ko agafashanyo bishuza gashobora kuboneka kuri uno wa kabiri canke kuwa gatatu.