Abarundi babaye aba mbere mw’ihiganwa rya Judo

Ku higanwa rigira iry’indwi rya Judo ryahuza ibihugu bihurikiye mu karere ka Afrika y’ubuseruko ryabereye muri Zanzibar mu ndwi twaraye turangije, Uburundi bwatwaye ibibanza vyiza cane: ikibanza ca mbere mu bakobwa, n’ica gatatu mu bahungu

Iryo higanwa ryamaze imisi ibiri rikaba ryahuje abahiganwa barenga ijana bavuye mu bihugu bitanu bigize akarere ka Africa y’ubuseruko.

Abarundi batahanye imidari 24, ku ruhande rw’abagabo n’ikibanza ca gatatu inyuma y Tanzaniya na Zanzibar. Igihugu ca Kenya catahukanye ikibanza ca kane n’imidari indwi, Urwanda akaba arirwo rwatahukanye ikibanza ca nyuma muri iryo higanwa kandi nta mudari rwatahukanye.

Ku ruhande rw’abakobwa, kw’isonga hari Uburundi mu kibanza ca mbere n’imidari 16 harimwo itatu y’inzahabu, bakurikirwa n’igihugu ca Kenya, Zanzibar, Tanzaniya n’Urwanda mu kibanza ca nyuma kandi.

Abakina Judo mu Burundi bavyifatamwo neza cane. Mu mwaka uheze, Uburundi bwaragiye ubwa mbere mu mateka yabwo mw’ihiganwa mpuzamakungu bita jeux olympiques i Londres mu gihugu c’Ubwongereza buserukiwe n’umwigeme Odette Ntahomvukiye w’ibiro 78