Abasaba gutanga imihoho aho kuzingamika ibikorwa vya kaminuza

Umushikiranganji w’inyigisho za kaminuza n’ubushakashatsi Yozefu Butore asaba abigisha batashimishijwe n’itangwa ry’akazi riherutse kuba muri kaminuza y’Uburundi ko botanga imihoho bakareka kuzingamika ibikorwa vya kaminuza.

Mu gihe haheze iminsi itari mike bamwe mu bigisha bari muri sendika STUB (Syndicat Libre des Travailleurs de l’Université du Burundi) biyamirije itangwa ry’akazi bavuga ko ritisunze amategeko, aho mbere ubwoko n’imigambwe arivyo vyoba vyashizwe imbere. Umushikiranganji w’inyigisho za kaminuza n’ubushakashatsi Yozefu Butore amenyesha ko abigisha baheruka guhabwa akazi muri kaminuza bagahawe hisunzwe amategeko. "Itangwa ry’akazi riheruka kuba muri kaminuza y’Uburundi ryakurikije itegeko ry’umukuru w’igihugu ryo mu kwezi kwa Gitugutu umwaka w’2012 mu ngingo yaryo y’icenda ariryo mbere rigenga na kaminuza muri kino gihe. Kumbure ni kubera ari itegeko rigiye mu ngiro ubwa mbere nico gituma bisa n’ivyateye impagarara".
Ivyo akaba yabimenyesheje mu nama yari yagiranye n’abarongoye ibisata bitandukanye muri kaminuza y’Uburundi, hamwe n’abarongoye abanyeshure, inama yabaye kuri uno wa gatanu igenekerezo rya 29 Gitugutu 2013.

Yozefu Butore, umushikiranganji w’inyigisho za kaminuza n’ubushakashatsi

Umushikiranganji Yozefu Butore asaba abarongoye ibisata bitandukanye vyo muri kaminuza y’Uburundi banka gushira mu ngiro ingingo iba yafashwe ko botanga imihoho aho kuburabuza ibikorwa vyo kwigisha. Asaba abo bose boba bafise akangonongono gutura ico kibazo ababijejwe babicishije mu rwandiko, bakerekana aho ikibazo kiri.