Abashingwamanza b’i Bujumbura bagabisha ko bashobora kwitwarira Reta

Urwego rw’abashingwamanza b’i Bujumbura ruragabisha Reta ko ruzoyitwarira muma sentare mpuzamakungu mu gihe yoshira mu ngiro umugambi inama nshikiranganji iheruka kwemeza wo guhindura ibwirizwa shingiro abo vyega bose bataragishwa inama.

Umukuru w’urwego rw’abashingwamanza b’i Bujumbura, Isidore Rufyikiri, mu kiganiro n’abamenyeshamakuru ku munsi w’ejo kuwa kabiri, yibukije ko ibwirizwa shingiro ryo kuwa 18 Ntwarante 2005 rigenga Uburundi ryavuye mu mwuvikano hagati y’abo vyari vyega bose, bumvikana ingene bokorana mu kiringo c’imfatakibanza caheranye n’ukwezi kwa Myandagaro 2005. Nk’uko amasezerano y’i Arusha abivuga, umukuru w’igihugu yakurikiye ikiringo c’imfatakibanza afise uburanganzira bwo kwitoza rimwe akiyongera irindi, ari navyo vyakozwe mu mwaka w’2005, n’uw’2010. Kuva aho hatanguriye ukutumvikana ku kiringo ca gatatu c’umukuru w’igihugu Petero Nkurunziza, niho haciye havugirwa uwo mugambi wo guhindura ibwirizwa shingiro, umugambi wemejwe mu nama nshikiranganji yo kuwa 9 na 10 Gitugutu 2013.

Umushingwamanza Isidore Rufyikiri, arongoye urwego rw’abashingwamanza b’i Bujumbura

Isidore Rufyikiri, umukuru w’urwego rw’abashingwamanza b’i Bujumbura aragabisha Reta isa n’iyishaka kwikorana uwo mugambi yonyene, ayibutsa ko ibwirizwa shingiro ridashobora guhindurwa canke gutosorwa abo vyega bose batagize uruhara, canke bacishe aho vyaciye ubwa mbere kugira iryo ryoba rigira rihinduke canke ritosorwe rijeho.

Urwego rw’abashingwamanza b’i Bujumbura basaba ibihugu vyafashije kugira amasezerano y’i Arusha n’ibwirizwa shingiro bijeho, hamwe n’ishirahamwe ry’ubumwe bwa Afrika n’ishirahamwe ry’abanyaburaya ko bova mu gacerere, ntibemere ko abategetsi b’Uburundi bahonyanga ibwirizwa shingiro, mu kurihindura atawe bagishije inama, ivyo navyo bikaba vyoba bishaka gukorwa mu ntumbero yo kurondera kwongera ikiringo co kwitoza umukuru w’igihugu Petero Nkurunziza