Abasirikare b’abarundi bagiye guhabwa inyigisho z’agateka ka zina muntu

Ubushikiranganji bwo kwivuna abansi buriko buratunganya inyigisho z’ibanze muvy’agateka ka zina muntu ku basirikare, kandi bikaba bitegekanijwe ko mu myaka ibiri iri imbere abasirikare bose b’abarundi boba bamaze guhabwa izo nyigisho.

Muri urwo rwego, ubushikiranganji bwo kwivuna abansi bwaratanze ku munsi w’ejo kuwa kabiri impapuro z’umutsindo ku ntwazangabo 16 zatanze inyigisho ku bijanye n’agateka ka zina muntu, ku basirikare bagera ku gihumbi n’amajana atanu.

Jacques Bizabigomba, umuhanuzi mu bushikiranganji bwo kwivuna abansi yamenyesheje ko ihangiro muri uyu mwaka turimwo yari ugutanga inyigisho ku basirikare n’imiburiburi 500 kuko hakundwa kuvugwa ihohotera rya kiremwa muntu mu gihugu. Icipfuzo c’ubushikiranganji bwo kwivuna abansi rero akaba ari uko mu myaka ibiri abahawe izo nyigisho boba biyongereye, mbere bishoboka abasirikare bose bakaba bashikiriwe.

Bizabigomba Jacques ivyo yabimenyesheje ku munsi w’ejo, mu birori vyo gutanga impapuro z’umutsindo kuri izo ntwazangabo 16, mu ruganda rwari rwayeguwe n’ubusikiranganji bwo kwivuna abansi.

Mwomenya ko izo nyigisho ziriko zitangwa mu ntumbero yo gusubiramwo itunganywa ry’inzego z’umutekano hamwe no kuzongerereza ubumenyi mu bikorwa vyazo.