Abasitanteri babiri baraye babogojwe

Bonaventure Ntirandekura yahora arongoye Komine ya Gihanga, na Cleophace Niyonzima wa komine Kanyosha, baraye bakuwe mu mabanga yabo kuri uyu wa kane igenekerezo rya 28 Ruhuhuma. Ivyo ni ivyavuye mu Manama mpanuzwajambo y’ayo makomine.

Kuri uyu wa kane, inama mpanuzwajambo ya komine Gihanga yarakoranye, ihamagawe na buramatari w’intara ya Bubanza iyo komine isanzwe irimwo. Muri iyo nama, bamaze kwihweza ubuzima bwa komine, basanze ifise ingorane nyinshi, harimwo kudahemba abakozi n’uko ingingo nyinshi zifatwa, zahora zigorana kuja mu ngiro. Ivyo navyo, bakaba basanze ahanini vyava ku kutumvikana kwari hagati ya musitanteri Bonaventure Ntirandekura, n’umukenguzamateka Makurata Ndabaneze yari arongoye inama mpanuzwajambo ya komine, ari naho hahavuye hava ingingo yo kubakura bompi.

Abo bakuwe barashimye iyo ngingo, na kare ngo bakora batumvikana. Ku bajenama 14 bari muri iryo koraniro, 14 nyene nibo bemeje ko Bonaventure Ntirandekura akurwa. Aho bikaboneka ko nawe nyene ari mu bafashe iyo ngingo. Nayo 11 nibo bahisemwo ko Makurata Ndabaneze ava mu mabanga yo kurongora inama mpanuzwajambo ya komine.

Cleophace Niyonzima yahora arongoye Komine Kanyosha we, yazize ko yasubije mu mabanga uwahora ari umuhanuzi wiwe w’ubuhingaTeresiyo Barakamfitiye. Uwo nawe, akaba yaheruka kwirukanwa muri ayo mabanga bidaciye mu mategeko n’inama mpanuzwajambo ya komine.

Ladisilas Bazuwiha yahora ari umuhanuzi wa musitanteri, ni we yaciye aba arashizweho ngo asubirire musitanteri naho nawe nyene avuga ko atarabona ikete rimugena.

Iyo nama yakuye Cleophace Niyonzima, yabaye Jacques Minani buramatari wa Bujumbura yayibujije.

Foto: Buramatari wa’intara ya Bujumbura