ADC - IKIBIRI : Amakosa yabonetse mu kwiyandikisha yerekana ubusuma bwateguwe na CNDD-FDD

Mu runani ADC IKIBIRI basaba ko amakosa yabaye mw’ iyandikwa ry’abazotora yokosorwa ataraho naho ico gikorwa kigasubirwamwo cose kuko cagaragayemwo amahinyu menshi cane, ariko mu mugambwe CNDD-FDD no mu murwi CENI bo si uko babibona.

Mu gisagara ca Bujumbura hariko harabera inama ihuza umurwi ujejwe gutegura amatora CENI mu Burundi, hamwe n’impande zose zirabwa n’ikibazo c’amatora. Intumbero y’iyo nama akaba ari kurabira hamwe uko igikorwa co kwiyandikisha cagenze hamwe no guhanahana ivyiyumviro ingene boha akaryo ku batashoboye kwiyandikisha muri za ndwi zibiri zari zatanzwe nabo bakiyandikisha. Petero karaveri Ndayicariye avuga ko iyo nama ibaye mu ntumbero yo kwumviriza impande zose zirabwa n’ikibazo c’amatora kugira batorere inyishu hamwe y’ibibazo bihari gurtyo babone gutera baja imbere.

Muri iyo nama yatanguye kuri uno wa kane igenekerezo rya 29 Nzero, haragaragara ukudahuza hagati ya bamwe n’abandi ku tunenge twabaye. Kubwa Léonce Ngendakumana, arongoye urunani ADC avuga ko bitangaje ukungene utunenge twagiye dutorwa muri ico gikorwa c’ukwiyandikisha twagiye tuba tumwe hose kandi ugasanga twakozwe n’abantu bamwe nyene, ku bwiwe avuga ko ari integuro y’umugambwe CNDD-FDD, yo kwiba amatora. Ndetse mugenzi we muganga Yohani Minani yafashe ijambo nawe nyene avuga ko utunenge twagiye twibonekeza twerekana neza ko amatora yamaze kwibwa. Aha bakavuga nk’ibinenge bikurikira : icerekeye amakarata ndangamuntu yahawe abanywanyi b’umugambwe CNDD-FDD ibicishije ku bajejwe intwaro abandi banywanyi b’iyindi migambwe bakazibima, abantu biyandikisha incuro nyishi, abana bahawe amakarata ndangamuntu batarakwiza imyaka, abantu bagiye bafatanwa amakarata menshi, amakarata y’abantu bitavye Imana yagiye akoreshwa, abagiye bategwa ubwoba bwo kuja kwiyandikisha n’aya misore ihurikiye mu mugambwe CNDD- FDD, n’ibindi n’ibindi.

Ariko Léonce Ngendakumana avuga ko ashima ko impande zose bahurizako ko habaye amakosa ariko aho badahuza n’uko abo mu murwi CENI hamwe n’umugambwe uri ku butegetsi basa n’abadaha uburemere amakosa yabaye. Leonce Ngendakumana yasavye ko hokoreshwa ico bita ’’Jeton electronique’’ kugira ntihaboneke ubusuma, akavuga ko n’ubwo ubwo buryo buzimvye Reta yarikwiye kuburondera aho ko igihugu kigwa mu ndyane. Ariko rero ngo n’ubwo biboneka ko umurwi CENI udashaka gukosora amakosa yagiye aboneka, uko bigenda kwose bategerezwa kuzoja muri matora.

Mu mugambwe CNDD-FDD bo ayo mahinyu avugwa n’abatavuga rumwe na Reta basa n’abatayabona kumwe, ku bwabo ngo impari ziguma ziri muri abo batavuga rumwe nta kindi zigamije atari gurtyoza uwo mugambwe hamwe no kubakura mw’ihiganwa. Mbere mu mugambwe CNDD-FDD bo bavuga ko iyo nama isa naho ije kubatesha umwanya gusa, ahubwo icari cihutirwa ku bwabo n’uko homanikwa intonde zerekana abiyandikishije gurtyo imyiteguro y’amatora ikabandanya ukuri kwamye, nk’uko Pascal Nyabenda abishikiriza. No mu mugambwe UPRONA wemewe n’amategeko bakaba basaba ko intonde zabioyandikishije zoshirwa ahabona.

Muri iyo nama n’abasanzwe baserukira amashirahamwe adaharanira ivyocaro vya poritike baronse akaryo ko kwerekana ivyegeranyo bakoze mu gikorwa co kwiyandikisha, naho nyene hakaba habonetse impande zibiri aho nko muri COSOME berekanye amahinyu menshi yagaragaye muri ico gikorwa, ariko nko mu mashirahamwe ONELOP na ACOPA, bakabona ko utunenge twabaye ari duto cane tutotuma ico gikorwa gisubirwamwo.

Tubamenyeshe ko iyo nama imara iminsi ibiri ikarangira kuri uno wa 30 Nzero, ku rutonde rw’ivyigwa uburyo bugiye gukoreshwa mu gutanga karangamuntu kugira abatiyandikishije bashobore kubikora hamwe n’ibijanye n’ico gikorwa n’ibindi.