ADC yagiriza Nduwimana kuba ariwe yamye afasha ivuka ry’amashirahamwe ya Nyakuri

Inyuma yaho Aimable Bakundukize na Gabriel Banzawitonde bagirishirije inama bavuga ko ari abanyawanyi b’urunani ADC Ikibiri kandi baruhijwe n’ibikorwa vy’urwo runani bakipfuza kugira urwabo, umushikiranganji w’intwaro yo hagati mu gihugu amenyesha ko umunsi bamwituye, bashaka gushinga ishirahamwe rifasha mu gutsimbataza amahoro, n’umutekano azobakira.

Mu kiganiro Karadiridimba, umushikiranganji w’intwaro yo hagati mu gihugu akaba avuga ko Bakundukize na Banzawitonde atabazi, ariko hamwe bomwitura baje gushinga ishirahamwe ritsimbataza amahoro n’umutekano, atari urunani rw’imigambwe rurihamwe, azobemerera, kuko na kare urunani ADC Ikibiri Nduwimana avuga ko rutemewe n’amategeko, kandi ivyo urwo runani rukora bidahuye n’amategeko.

Mu runani ADC Ikibiri rero bakaba bavuga ko badatangazwa n’imvugo y’umushikiranganji w’intwaro yo hagati mu gihugu Edouard Nduwimana, kuko bemeza ko yarondeye kuva kera ukwo yobafuta biramunanira, ubu akaba ari naco gituma ariko akora ijoro n’umutaga ararondera ayandi mashami ya Nyakuri muri urwo runani. Leonce Ngendakumana asanzwe arurongoye, akavuga ko uyo mushikiranganji ariwe yama afasha abasambura amashirahamwe canke imigambwe yose ivuga ibitagenda neza mu gihugu, mu kubacamwo amashami.

Umushingamateka Ngendakumana akaba abandanya avuga ko basavye umushikiranganji w’intwaro yo hagati mu gihugu ko imigambwe 40 ari myinshi, ko nyabuna igikuru ari ukwo yofasha imigambwe yacitsemwo imice igasubirana, ariko umushikiranganji yanse, none ubu abandanya gufasha ivuka ry’ayandi mashami ya Nyakuri. Leonce Ngendakumana akaba arangiza amenyesha ko urunani ADC Ikibiri rwikwije, kandi rutazigera rutinya agashami kose koza kubacamwo imirwi, ari naco gituma, umurwi mushasha utamuteye ubwoba kuko atanahamwe uzwi haba mu gihugu hagati canke mu gisagara ca Bujumbura.

Tukabamenyesha ko Aimable Bakundukize na Gabriel Banzawitonde barongoye uyo murwi uvuga ko wavuye inyuma ya ADC Ikibiri aho bavuka ku Ndava, abanyagihugu baho bemeza ko abo bantu ari abasuma, ababeshi, mu gihe Aimable Bakundukize we yahinduye n’izina, araheza yiyita Teophile Bakundukize, ari naho ku Ndava bamwita nabo Teopiste. Teopiste rero akaba yahinduye izina amaze kuyoberwa ikibazo c’umwaka wa gatandatu, maze aca afata iryo zina rishasha araheza abona kubandanya amashure gushika mu mwaka w’10 mu Kinama ca Bujumbura, aho yaciye yironderera urupapuro rw’umutsindo rwa kaminuza rwo mu gihugu kibanyi ca Kongo iharanira intwaro rusangi, ndetse bikavurwa ko afise n’ubuhinga mu gukora impapuro z’umutsindo za magendo, nk’uko bagenzi bacu b’iradiyo ijwi n’abanyagihugu babitohoje.

Kuri ivyo, umuvugizi w’urwo runani Alliance pour la Paix, la Démocratie et la Réconciliation ruvuga ko rushaka gutembagaza ADC Ikibiri Gabriel Banzawitonde, avuga ko muri poritike ivyo bibaho ko umwe wese abavuga uko ashatse.