Afganistan: Ibitero vyahitanye abantu cumi na batatu

Abategetsi ba Afghanistan bamenyesha ko abantu 13 aribo bapfuye, abagera kuri 20 barakomereka, mu bitero bibiri bitandukanye vyakozwe ku murwa mukuru Kabul no mu ntara ya Zabul, iri mu maja epfo.

Imirwi irwana y’aba Taliban ikaba yiyemereye ko ariyo yakoze ivyo bitero.

Igitero ca mbere cakorewe hafi y’ikibuga c’indege mpuzamahanga ca Kabul catumye ingendo zose z’indege zitari iza gisirikare zihagarikwa.

Inzego z’igipolisi muri Kabul zimenyesha ko haheze amasaha atatu bari mu mishamirano, barasana n’abakoze ivyo bitero bibiri. Muri ico gihe hari n’ikindi gitero cakozwe ku biro bikoreramwo umurwi utegura amatora mu mu ntara ya Zabul.