Afrika y’Epfo : Abashingamateka bagabishije kwitaba ibikorwa bari gusa

Abashingamateka bo mu gihugu ca Afrika y’Epfo baragabisha ko buca bashikira mu myiyerekano idasanzwe, ni basubira mu bikorwa vyabo.

Muri ivyo bikorwa bitegekanijwe mu ndwi zibiri inyuma y’akaruhuko, abashingamateka bo mu mugambwe utavuga rumwe na Reta EFF, bavuga ko bashobora kuzitaba ibikorwa vy’inama nshingamateka bari gusa, mu kugaragaza umubabaro wabo, aho bankiwe kuzotonda bambaye impuzu zitukura, zisanzwe zambara abakozi basanzwe. Abo bashingamateka barimwo abagore hamwe n’abagabo bagera kuri 25, barongowe na Julius Malema, bakavuga ko bazambara izo mpuzu vyanke bikunde, bankiwe bakazotonda bari gusa. Abo bashingamateka bakaba baranasavye ndetse n’abo mu ntara kwambara izo mpuzu, kugira babashigikire.

Richard Mdakane asanzwe ari mu murwi ujejwe kwiga ibibazo vy’inyambaro aho mu nama nshingamateka, akavuga ko bariko bararabira hamwe uko izo nyambaro zosubirwamwo, mugusoneranira. Abo bashingamateka rero bashaka kwambara izo mpuzu, zikaba zambarwa ahanini n’abantu babayeho mu buzima bubi aho muri Afrika y’Epfo, abakozi batobato, aho abo bashingamateka bavuga ko bagomba kwifatikanya n’abo muri ubwo buzima babayemwo, kuko abo bantu basa n’abibagiwe.

Bavuga ko abo banyagihugu nyene batobato aribo babatoye, ari naco gituma uko bigenda kwose bategerezwa kubarwa inyuma mu gihe ubuzima bwabo butohabwa agaciro. Umugambwe uri ku butegetsi ANC ukabona ko ari imyiyamamazo ya poritike.