Afrika y’Epfo: Umugambwe ANC niwo uza kwisonga mu matora y’abashingamateka

Mu gihugu ca Afrika y’Epfo harabaye amatora y’abashingamateka kur’uyu wa gatatu. Ivyegeranyo vy’imfatakibanza bimaze gusohoka vyerekana ko umugambwe ANC uri ku butegetsi ariwo uri imbere.

Amatora y’abashingamateka yo kur’uyu wa 7 Rusama yitabwe n’abanyagihugu bagera ku miriyoni 25. Hakaba hatowe abashingamateka 400. Ivyegeranyo vy’amatora vya 75 kw’ijana y’ibiro vy’amatora vyerekana ko umugambwe ANC uza imbere ku majwi 62,3 kw’ijana.

Amajwi ya ANC yaragabanutse ugereranije nayo uwo mugambwe waronse mu 2009. Ayo nayo akaba yari 66,9 kw’ijana. Ababikurikiranira hafi bavuga ko iryo gabanuka rishobora kuba ryavuye ku bukene bwugarije abanyagihugu n’umutekano muke urangwa rimwe na rimwe mu bisagara vyaho muri Afrika y’Epfo. Ivyo bigatuma abanyagihugu batakicizera rwose ubutegetsi bwa ANC.

Nubwo biri uko, abanyagihugu bo muri ico gihugu cane cane b’abirabure bemeza ko bakiciyumvamwo uwo mugambwe kuko ariwo wabakuyeko intwaro ya karyanishamiryango (“Apartheid”), narirya ariwo mugambwe w’umuhisi Nelson Mandela, abanyafrika y’epfo benshi bakunda.

Mwomenyako, abashingamateka batowe aribo bazotora umukuru w’igihugu kuwa 21 Rusama. Kandi umukuru w’igihugu ahari ubu, Jacob Zuma akaba afise amahirwe yo gutorwa muri ico kibanza.Ayo matora akaba ari aya mbere abaye inyuma y’urupfu rwa Nelson Mandela, umukuru w’igihugu wa mbere w’umurabure. Uno nawe akaba ari mu bashinze uwo mugambwe kandi akanakuraho intwaro karyanishamiryango.