Afrika y’Epfo: Umukuru w’igihugu Jocob Zuma yasabwe gutanga imihoho

Kuri uyu wa gatatu igenekerezo rya 16 Kigarama, mu gihugu ca Afrika y’Epfo harateganijwe imyiyerekano isaba umukuru w’igihugu Jacob Zuma gutanga imihoho mu kibanza c’umukuru w’ ;igihugu.

Jacob Zuma avugwako vyinshi , inyuma yo guhindura umushikiranganji w’ubutunzi incuro zibiri mu ndwi imwe gusa,bikaba vyatumye ifaranga ry’igihugu rita agaciro ndetse n’ibintu kw’isoko birahindagura ibiciro.

Iradiyo y’abafaransa RFI ivuga ko imyiyerekano yitezwe mu gisagara ca Johannesburg, Pretoria, Port Elizabeth, Capetown n’ahandi, nk’uko vyasabwe n’amashirahamwe ategamiye Reta.

Ayo mashirahamwe yagiriza Jacob Zuma gushira mu kangaratete ubutunzi bw’igihugu,afise intumbero yo gushika ku nyungu ziwe gusa,kuva agenye umushikiranganji amwegereye ariko atazwi cane ku rubuga rwa politike.

Ico ciyumviro catangujwe n’abatavuga rumwe na Reta bari kumwe n’amashirahamwe ategamiye Reta,ariko aho bigeze ubu hari abandi bakomeye bava mu mugambwe uri ku butegetsi ANC bamaze kuvyinjiramwo.